Sinuspenso pay laeng ti Land Transportation Office (LTO) iti baro a bilinda a mangpataw iti dakkel a muelta kadagiti nagilako ken gimmatang iti segunda-mano a lugan a saan a naireport iti panaglakoan ken saan a naiyakar iti baro nga akin-kukua iti rehistro iti lugan.
Iti nairuar a memorandum a napetsaan iti October 23 a pinirmaan ni LTO Chief ken Assistant Secretary Atty. Vigor Mendoza II, nasuspenso iti implementasyon ti Administrative Order No. VDM-2024-046 a nairuar idi Agosto.
Segun ken ni Mendoza, tapno nasaysayaat iti pannakaipatungpalna ket masapul a maikkan iti atiddog a panawen dagiti stakeholders a mangted iti opinyonda.
Immunan a nailanad iti AO No. VDM-2024-046 a mapatawan iti agingga P40,000 iti gumatang ken agilako iti segunda-mano a lugan a saan a maireport iti panagilako ken pannakaiyakar iti rehistro iti baro nga akin-kukua iti lugan.
Nakalanad pay dagiti rekisito a kasapulan para iti pannakaiyakar ti rehistro pakairamanan ti notarized deed of conveyance, original OR/CR manipod LTO, motor vehicle clearance certificate iti lugan manipod Philippine National Police – Highway Patrol Group, dua a valid government-issued IDs iti buyer ken seller ken dadduma pay.
