VIGAN CITY – Pinalagipan ni Larry Jun Morales, Head iti Land Transportation Office – San Ildefonso dagiti dandanin agexpire ti lisensyana a mapandan agi-renew.
Iti pannaki-uman ti Bombo Radyo Vigan ken ni Morales, adda laengen agingga Nobiembre 6 ti panagparenew dagiti agexpire iti lisensyana iti April 1-30.
Dagiti agexpire ti lisensyana iti May 1-31 ket adda pawaywayda agigga iti November 30; dagiti agexpire ti lisensyana iti June 1-31 ket adda met agingga iti December 31; dagiti met agexpire iti lisensyana iti July 1-31 ket agingga January 31, 2024 a pawaywayda.
Kabayatanna, dagiti agexpire ti lisensyana iti August 1-31 ket mabalin nga i-renew agingga February 29, 2024 idinto a dagiti agexpire iti September 1-30 ket mabalin nga irenew agingga March 31, 2024.
Inlawlawag met ni Morales a maipangruna pay a maikkan iti cards dagiti nagirenew idi bulan ti Abril kagiddan ti pannakaisangpet ti sangaribo lima gasut a cards para iti driver’s license.
Kunana nga awanen ti bayadanda ta nabayadanen amin dagiti fees idi nagirenewda isu a ti laengen panag-biometrics ti nasken a maaramid.