Inruar ti show cause order ti Land Transportation Office (LTO) kontra ti tricycle driver owner a naaktoan iti nagpaguyod ti pusa a naigalot iti lugan idiay Pangasinan.
Segun ken ni LTO Chief Vigor Mendoza II, ti tignay ti registered owner iti tricycle nga adda plate number na a 206-WLY ket saan a kaawat-awat iti inaramidna.
Kinuna ni Mendoza a saanda nga itulok a mabaybay-an laeng ti kaso isu a siguradoenda a madusa ti nagbasol.
Pinasingkedan ti LTO Chief a makiddaw ti driver nga agpalawag kas paset ti due process.
Masapul nga agipasa ti registered owner iti written ken notarized explanation nu apay a saan a rumbeng a masuspenso ken marevoke iti driver’s license-na iti panagbalinna nga Improper Person to Operate a Motor Vehicle.
Innayonna pay a ti tricycle ket maipasidong iti under alarm tapno maliklikan ti aniaman a transaksyon bayat a maimimbestigaran iti nasao a kaso.
