VIGAN CITY – Love triangle ti iberberipika a motibo dagiti pannakabagi ti linteg iti pannakatay ti maysa a lalaki gapu ti pammaltog idiay Barangay San Pablo, Sto. Domingo.
Nabigbig ti biktima a ni Bryan Pascua, agtawen iti tallopulo ket siam, taga-Barangay Labnig, San Juan idinto a ti suspek ket ni Honorato Tabusares, agtawen iti limapulo ket lima, Barangay Kagawad, a taga-Barangay San Pablo.
Iti pannaki-uman ti Bombo Radyo Vigan ken ni Police Captain Medel Perinion, agiinom ti biktima ken dagiti gayyemna a da Jun Tuzon ken ni Bonie Patac iti pagtaengan ni Cristina Tuzon idin ta napan immisbo ti biktima iti kalsada ket isu met ti panangsurot ti suspek a nangpaltog iti barukongna.
Kalpasan dayta ket dagus a naglibas ti suspek a naglugan iti bisikletana basar kadagiti nakaimatang iti pasamak isu a dagus met ti panagkiddaw ti Sto. Domingo Police Station iti tulong kadagiti kabangibang a kuerpo ti pulisya para ti hot pursuit operation.
Sinapul dagiti pannakabagi ti linteg ti suspek iti pagtaengan ken iti family house-da ngem saanda a nasarakanda agingga nga idi sinerrekda ti comfort room nga asideg ti balay ti kabsatna ket isu met ti pannakasarak kenkuana.
Iti agdama, saan pay laeng a mabigbig no ania ti paltog ti nausar ngem paltik ti maipagarup agsipud ta dakkel ti entrance point ti buli iti barukongna.
Nupay kasta, kaso a murder ti maipila kontra iti suspek.
