VIGAN CITY – Kontraen ni House Minority Leader Bienvenido Abante ti 6th District ti Manila ti insingasing ni House and Ways Committee Chairman ken Albay Rep. Joey Salceda a mailock down ti Metro Manila tapnu maliklikan ti coronavirus disease 2019 gapu ti umad-adu a kaso ti nasao a sakit ditoy pagilian.
Ti pannaki-uman ti Bombo Radyo Vigan ken ni Abante, patien na a nu matuloy ti inbaga ni Salceda ket agbuteng laeng dagiti tattao ken nakaro a maapektaran iti ekonomiya isu a masapul laeng a nainget a maipatungpal dagiti precautionary measures kontra iti nasao a sakit ket saanen a masapul ti lockdown.
Ingunam-gunam pay ni Abante a masapul a nakasagana ti Department of Health a mangisayangkat kadagiti addang kas iti contact tracing ken masapul nga agbalin da a transparent wennu awan iti idulinda nga impormasion iti publiko inaig ti nasao a sakit.
Kidkiddawen na a saanen nga urayen ti Department of Education ti schedule ti school calendar para kadagiti agturpos nga estudiante ken ikkanda laengen ti workload dagiti agad-adal ken mangisursuro kadagiti pagtaenganda tapno maliklikan da ti virus.
