VIGAN CITY – Patien ni Samahang Industriya ng Agrikultura (SINAG) Chairman Rosendo So a ti local production ti nasken a bantayan ti sumaruno a secretary ti Department of Agriculture.
Iti exclusive interview ti Bombo Radyo Vigan ken ni So, mangnamnama laeng ni agriculture secretary William Dar iti importasyon isu a naibagana a posible a mapasaran ti food crisis.
Innayon ni So a no maipasigurado la koma kadagiti mannalon a saanda a malugi ken maallukoyda nga agmula ket awan ti rebbeng a pakadanagan maipanggep ti suplay iti taraon.
Insingasingna a nasaysayaat no ti adda iti panunot ti secretary ket mapalawa ti pagmulaan iti pagilian saan ket a ti panagangkat manipud iti sabali a pagilian ken agpangta iti publiko.
Iti tawen 2020 agingga 2021 a panawen ni Dar, ngimmato iti tallo a milion a metriko tonelada a bagas ti naiserrek ditoy pagilian manipud iti dati a 1.5 metriko a tonelada.
Saan laeng a bagas ti immadu nga ang-angkaten ti pagilian agsipud ta uray pay agriculture area ti pagilian ket maangkat pay ti ikan, karne ti manok, karne ti baboy, ken asukar.
