VIGAN CITY- Dagiti laeng local chief executive kas kadagiti gobernador, mayor ken congressman iti mabalin nga imbitaran iti pagadalan a guest speaker kadagiti moving up ken graduation ceremony dagiti agad-adal kas maibasar iti pagannurutan ti Department of Education.
Segun ken ni Education Undersecretary Tonisito Umali babaen iti eksklusibo a pannaki-uman ti Bombo Radyo Vigan, masapul laeng a masigurado a saan a mapulitika dagiti nasao nga aktibidad tapnu mapagtalinaed iti usto a kaipapanan na.
Inlawlawag ni Umali a nu ti maysa a kandidato ket naimbitaran nga agsao ken manginspirar kadagiti agturpos nga agad-adal gapu ta isuna ket nagturpos met iti pagadalan a nangimbitar kenkuana, masapul laeng a ti panagsarita na ket agtayyek iti naited kenkuana a tema iti completion wennu graduation ceremony, ket saan na a mabalin iti agkampanya.
Nu bilang adda ti makalibas nga agkampanya kadagiti nasao nga aktibidad, ti principal iti pagadalan ti madaksan ta masapul nga isuna iti mangipatungpal kadagiti pagannurutan ti Deped iti uneg ti pagadalan.
