VIGAN CITY – Nagyaman ni Provincial Social Welfare and Development officer Ferdinand “Joy” Concepcion gapu iti naballigi a pannakaisayangkat ti Little Provincial Officials Day kas paset iti agtinawen a panangrambak ti National Children’s Month nu madanun iti bulan ti Nobyembre.
Ti nasao nga aktibidad ket nakipagpasetan dagiti student leader iti probinsia a naggapu kadagiti naduma-duma a pagadalan a kas ti Ilocos Sur National High School, St. Paul College of Ilocos Sur, Divine Word College of Vigan ken University of Northern Philippines.
Dagiti student leader a naggapu kadagiti nasao a pagadalan ket nagakem kas little provincial officials ken department heads idiay provincial capitol.
Patien ni Concepcion a babaen iti kapadasan dagiti student leader nga agakem a kas little provincial officials ken department head ket maallukoy ti riknada nga agbalin a nasayaat a lider iti masangwanan.
