Pinagduaduaan ni Senador-judge Lito Lapid no maar-aramat laeng dagiti nadumaduma a sektor ni Davao City Accountant Vingelin Bajan kalpasan a narigatan a nangsungbat kadagiti saludsod manipud iti prosekusion iti impeachment trial ni Bise Presidente Sara Duterte.
Sinaludsod ni Lapid ni Bajan maipapan iti dati a pannakitinnulongna iti accounting firm nga Ampil, Elises, Ciudadano & Co. CPAs, a mapapati a nang-audit kadagiti kompania a nainaig ken ni Duterte.
Pinasingkedan ti prosekusion a nailista ni Bajan kas partner ti nasao nga accounting firm, no man pay inaminna a saan nga aktibo a nakipaset kadagiti aktibidad.
Impeksa ni Lapid ti pannakaseknanna iti maulit-ulit a saan a panangsungbat ni Bajan kadagiti saludsod manipud kadagiti senador ken dinakamatna pay ti posibilidad a maibilang a panang-contempt ti Senado.
Nainget a pinagkedkedan ni Bajan ti saludsod ni Lapid nga isu ket maar-aramat laeng dagiti dadduma a sektor ken impaganetgetna a saan nga maus-usar iti laksid dagiti saludsod ti senador maipapan iti panangaramat ti accounting firm iti naganna.
Indagadag ni Lapid ken ni Bajan nga ibagana ti pudno ken kuestionaranna no apay nga ipalubosna a mausar ti naganna kadagiti audit ken kompania a saanna nga ammo ti detalye, sakbay nga inyangawna a nalabit nalipatanna payen ti panagkasangayna.
