Agtultuloy ti Philippine National Police (PNP) iti ar-aramidenda a validation ken consolidation iti listaan maipanggep ti operasyon kontra iti illegal gambling kangrunaan iti e-sabong.
Segun ken ni PNP Public Information Office Chief Brig. Gen. Randulf Tuaño, dayawen ti PNP ti sarita ti agpampanday linteg ken bigbigen ti oversight role iti Senado iti panangkita ti operasyon ken panagaramat ti pondo iti ahensya.
Maipalagip a kwinestyunaran ni Senator Raffy Tulfo iti PNP iti panagdenggeg iti Senate Committee on Games and Amusement idi napan a lawas ket impaganetgetna iti panagaramat ti intelligence fund ken nangibingay ti live video footage iti mapapati nga illegal e-sabong operation iti Central Luzon.
Mainaig dayta ket nagtaripnong ti Directorate for Operations tapno pagkaykaysaen ken adalen dagiti report manipod iti agduduma a unit iti kapulisan mainaig iti kampania iti e-sabong.
