VIGAN CITY – Pinasingkedan ni Police Chief Master Sergeant Domingo Reburon a Chief Investigator iti San Ildefonso Municipal Police Station nga innalada aminen a listaan dagiti masikog iti ili a San Ildefonso kasaruno iti pannakaikali ti maysa a maladaga.
Iti pannaki-uman ti Bombo Radyo Vigan ken ni Reburon, uray dagiti kabangibang nga ili ken siudad ket alaendanton ti listaan dagiti masikog para ti panangtunton ti pamilia ti ubing a nasarakan.
Nasakit met ti nakem ni Kagawad Edwin Palomares a taga-Bungro, San Ildefonso iti nangikali ti maladaga a nasarakan iti lugarda ta kas maysa nga ama ket maasyan ti napasamak iti maladaga ta kunana a saan man laeng a nakonsensyan ti nangaramid.
Innayonna nga ubbing ti nakakita iti maladaga ket naipakaammo laeng kenkuana isu a nagtignay ket tinawaganna dagiti pannakabagi ti linteg.
Patienda a nakonsensya met laeng ti nangikali iti maladaga ta saan nga amin a parte ti bagina ket naikali ta amangan ni kayatda met laeng a maitabon a nasayaat.
