VIGAN CITY – Imbutaktak ni Philippine Amusement and Gaming Corporation (PAGCOR) Chairman ken CEO Alejandro Tengco a maysa a dati a nangato nga opisyal ti gobierno iti nangted iti authorization a maikkan ti lisensia dagiti illegal a POGO.
Segun ken ni Tengco, kasapulan ti naan-anay nga imbestigasion kadagiti aktibidad dagiti operator ti POGO ken dati nga opisyal a karaman.
Inyunay-unayna a dagiti laeng operator nga addaan iti umno a lisensia ti rumbeng a mapalubosan nga ag-operate iti gaming activities.
Ububraen metten ti agdama nga administrasion a kissayan iti bilang dagiti illegal nga operasion ti sumagmamano a POGO a nagresulta iti panagbaba iti uppat a pulo ket tallo a lisensiado manipud iti 298 idi napalabas nga administrasion.
Impasigurado ni Tengco a nakasagana ti PAGCOR a mangibutaktak iti nagan dagiti tattao a mangsupsuporta kadagiti illegal operations, ken nakasaganada ti gobierno a labanan dagiti illegal nga aktibidad gapu ta pangta daytoy iti kinatalged ti publiko.
