Maipatungpal ti temporaryo a liquor ban ken curfew kadagiti pampubliko a lugar iti ili ti Santa gapu iti pangta ti Tropical Storm Emong.
Babaen dayta ti impaulog nga Executive Order No 107, series of 2025 ni Mayor ATTY. JEREMY JESUS DP BUENO, III.
Iti pannaki-uman ti Bombo Radyo Vigan ken ni Municipal Disaster Risk Refuction and Management Officer Vince Clyde Cardenas, ti addang ket tapno malimtaran ti garaw dagiti agindeg ken iparit ti panaginom iti arak iti panawen ti didigra ta napatpateg ti panagsagana tapno mailisi iti peggad.
Maibasar iti pammilin, maiparit ti panagilako, panagiwaras ken panaginom iti arak kadagiti pampubliko a lugar, commercial establishment, ken convenience store iti uneg ti ili.
Maiparit ti agtalinaed kadagiti pampubliko a kalsada, barangay road, open space ken dadduma pay a pampubliko a lugar malaksid kadagiti emergency responder ken health and security personnel, authorized personnel on duty, ken dagiti agindeg nga agkasapulan iti medical attention manipud iti alas otso iti rabii agingga alas singko iti bigat nga isu ti naituding a curfew hours.
