VIGAN CITY – Limapulo ket tallo a pamilia ti agtaltalinaed idiay San Emilio East Central School a nagserbi kas temporaryo nga evacuation site dagiti evacuee iti napasamak a magnitude 7 a gingined idi kallabes.
Segun ken ni Mayor Joey Warren Bragado, dagiti pamilia ket naggapu kadagiti tallo a sitio iti maysa a barangay a naibilang a napeggad ti kasasaadna gapu kadagiti panagrengngat ti bantay, daga, ken dagiti kalsada.
Idi damo ket adu pay dagiti pamilia a naibakwit iti nasao a lugar ngem nakasublin dagiti dadduma iti pagtaenganda.
Ti Barangay Matibuey ti maysa kadagiti makitada a kakaruan a naapektaran ta isu ti linasat ti Abra river fault line, ket adu dagiti nadad-dadael.
Kabayatanna, umaboten iti tallopulo a milion ti gatad dagiti nadadael iti sektor ti agrikultura, imprastraktura ken dadduma pay iti nasao nga ili a posible pay a manayunan ta agtultuloy ti assessment a maisaysayangkat.
Nagyaman met ti mayor kadagiti naawatda a tulong a naggapu kadagiti nadumaduma nga ahensia kas ti Department of Social Welfare and Development, Philippine National Police Region 1, Local Government Units, Non Government Organizations ken dagiti pribado nga indibidual.
