VIGAN CITY – Limapulo ket siam nga insidente ti hate crime ti nairekord idiay New Jersey ngem awan ti Pilipino a biktima kas pinasingkedan ni Bombo International Correspondent Edmar Del Rosario a tubo iti Pangpangdan, Sto. Domingo nga ita ket maysa a negosyante idiay Bayville, New Jersey.
Iti pannaki-uman ti Bombo Radyo Vigan ken ni Del Rosario, dagiti insidente ket mapaspasamak laeng kadagiti dadakkel a siudad iti nasao nga estado ken adu dagiti agprotprotesta nga Asian-American community members tapno ipasardeng ti hate crime.
Kadagiti sub-urban a lugar ket awan ti mapaspasamak a hate crime ta nadlawna a naan-annad tattan dagiti tattao kangrunaan ti Chinese community.
Nupay kasta, insingasingna a masapul a naalibtak ti gobierno a mangipakaammo kadagiti tao no ania ti masapul nga aramidenda no isuda man ket biktima ken kasta payen ti nayun a pwersa ti kapulisan a mangbantay iti aglawlaw.
Binalakadanna dagiti padana nga Asyano a masapul nga aramidenda latta ti husto a wagas tapno saanda a mailaklaksid, amuenda ti karbenganda kas maysa nga umili ken kas maysa a tao ken saanda a mabuteng nga agipulong kadagiti maseknan.
