VIGAN CITY – Maipaayan iti sag-tunggal lima ribo a pisos dagiti empleado ti Ilocos Sur Provincial Government iti umuna a gundaway kas panangtulong kadakuada iti baet ti pannakadidigrada gapu ti bagyo Egay.
Iti pannaki-uman ti Bombo Radyo Vigan ken ni Governor Jerry Singson, maibilang met laeng a biktima iti bagyo dagiti agserserbi iti provincial capitol ken bigbigenna ida a katulongan ti gobierno-probinsial.
Numan pay adda dagiti pondo nga aggapu iti national government ket agpaay met daytoy kadagiti agindeg isu a napanunotan ti provincial government a mangkita pay ti nayun a pondo nga agpaay met kadagiti nasao nga empleado.
Kabayatanna, adda laeng ti nasapulanda a pondo nga agpaay kadagiti 2,500 nga empleado isu nga imbilin ti gobernador ti pannakasapul pay iti nayunna ken no mabalbalin ket uray aggapu met laengen iti opisinana.
Nupay kasta, karaman a maipaayan dagiti empleado a permanent, job order ken uray dagiti on-the job trainee.
