Idurduron ni Trabaho partylist Rep. Johanee Bautista iti lima nga aldaw a calamity leave nga addaan ti full pay wenno buo a bayad kadagiti kwalipikado nga empleado iti gobierno ken iti pribado a sektor a direkta nga apektado iti didigra.
Nakaipauneg dayta ti House Bill 4434 wenno gakat a “Calamity Leave Act” nga impila ni Bautista a gagem a matulongan a makalung-aw dagiti biktima iti didigra ta masigurado nga adda iti maalada a sueldo uray agliwayda iti trabaho.
Maibasar iti gakat ni Bautista ket masapul a ti rason ti calamity leave ket dagiti sumaganad:
Insigida a panangsimpa ken panagdalus iti naapektaran a pagtaengan wenno sanikua; pannaka-stranded iti lugar a nadidigra wenno awanan iti available a transportasyon; pannakadunor wenno panagsakit gapu iti didigra; panangtulong kadagiti kabagyan ti biktima iti didigra; ken dadduma pay a rason nga ikonsiderar iti employer.
