VIGAN CITY – Lima nga agtigailako iti Vigan City Public Market ti nabiktima iti peke a PHP1000-peso bill nga imbayad dagiti gimmatang.
Iti pannaki-uman ti Bombo Radyo Vigan ken ni Harold dela Cruz, market master iti Vigan City, uppat nga aglaklako ti nabiktima iti meat section idinto a maysa iti fish section.
Kunana a saanen a nadlaw dagiti aglaklako a peke ti inawatda a bayad gapu iti kinaadu dagiti gumatgatang ngem idi madama ti imbentaryoda, isu ti pannakaduktalda a peke dagiti sangaribo a pisos a naibayad kadakuada.
Kabayatanna, maysa kadagiti suspek ti nanggandat koma manen a mangbiktima iti biktimada iti kalman ngem nalasin isuna ti biktima.
Nupay kasta, nagballaag ni Dela Cruz kadagiti aglaklako a kitaenda dagiti awatenda a bayad dagiti customer tapno maliklikan ti pannakalimlimoda.
