VIGAN CITY – Lima ti natay pakairamanan ti maysa nga ubing idinto a tallopulo ket walo ti nadunor iti panagbettak iti maysa a bodega ti paputok a kukua ni Jojie Chua idiay Zamboanga City.
Segun ken ni OIC City Police Director Police Col. Kimberly Molitas, nadunor pay ti akinkukua a ni Chua ken gapu iti impact ti napigsa a panagbettak ket nangitunda iti nakaro a dadael kadagiti balay ken dagiti pasdek.
Iti agdama, agtultuloy ti ar-aramiden nga imbestigasyon ti Bureau of Fire Protection tapno maamuan no ania ti rason ti panagbettak.
Narigat ti nagbalin a rescue operation para kadagiti trabahante a nabati iti uneg gapu iti kadakkel ti apoy ken nagtultuloy ti panagbettak dagiti nabatbati a paputok.
Kabayatanna, naklaat met dagiti residente ken dagiti agindeg iti nasao a barangay nga adda bodega idiay ti paputok ta no saan pay a bimtak ket saanda pay nga ammo.
