VIGAN CITY – Direct Assault ken Grave Threat ti sangwen a kaso dagiti lima a tattao a nangpangta ken ni Brgy. Kagawad Rodolfo Vacalares Agpalo, agtawen iti limapulo ket siam, mannalon a taga-Brgy. Cabaroan, San Esteban.
Dagiti suspek ket da George Bolaños Eleccion, agtawen iti limapulo ket lima; Joel Pimentel Eleccion, agtawen iti duapulo ket pito; Eric Agpalo Eleccion, agtawen iti uppat a pulo; Jonathan Pimentel Eleccion, agtawen iti tallopulo nga agpapada a mannalon ken ni Grace Pimentel Eleccion, agtawen iti duapulo ket siam, awanan trabaho.
Segun ken ni PLt. Arnold Calzado iti San Esteban Municipal Police Station, alas otso iti agsapa idi August 11, napan nagispray ti biktima iti insecticide kadagiti pagayna idin ta nadlawna ti barut a naisalat iti mulana.
Simsimpaen ti biktima iti barut idi dimteng ni George Bolaños Eleccion ket sinitarna ti ar-aramidenna sa pinangtaanna pay ti biktima idinto a ni Joel Eleccion ket nagisawang iti dinadakes a balikas kontra ti biktima.
Idi manen alas tres iti malem ti August 14, napan nagikabil iti ganagan ti biktima kadagiti pagayna ket nakitana ti kaanakanna a ni Eric Agpalo Eleccion.
Dinamag ti biktima ni Eric maipanggep kadagiti nakatalaw a kalding ket simungbat met a kukuana isu a nagbalakad ti biktima nga igalut dagiti kalding ta adu dagiti reklamo a maipanggep iti kastoy a banag.
Nagpungtot ni Eric ket pinagsawsaw-an ken pinangtaanna ti biktima a puon ti nagririanda agingga a nagsubli ni Eric iti balayda ken kasta met ti biktima a napan nangala iti nayun a ganagan ket idi nagsubli, linapdan isuna ni Eric ken ti live-in partner-na a ni Grace.
Pinadas ti biktima a lisyan ida ngem pinagtinnulonganda nga impaigid ket binekkel ken dinanugda iti namin-adu a daras.
