VIGAN CITY – Desidido da Oscar Jimenez Viloria a taga-Bannuar, San Juan; Herbert Vallejo Saquiton a taga-Daclapan, Cabugao; Nicole Segui, Regie Battad kenni Vico Angelico Savellano nga agpapada a taga- Bonifacio, Cabugao a mangiyuli ti darum kontra ti suspek iti kaso a grave threat ta idi nagpapatang da idi kalman ket inpatangken ti suspek a ni Jun Rebibis nga agnaed idiay Sitio Turod, Bacsil, San Juan a saan a paltog ti inpaturong na kadakuada.
Segun ken ni Police Captain Jade Macaraeg, hepe ti San Juan municipal police station, nagpapatang idi kalman, April 2, dagiti dua a partido ngem awan ti nagtutulagan da ta saan nga inaklon ti suspek iti basol na.
Immuna iti dayta, idi alas kwatro ti malem idi April 1, agpapa-abagatan a direksyon dagiti lima a nakabisikleta ket sumar-saruno kadakuada ti suspek a nakalugan ti Toyota Innova na, idi nakadanun da idiay Guimod Norte, San Juan, binusinaan ida ti suspek isu a nakigtot da ket nabugkawan da ti suspek nga isu iti nakapungtotan na isu a bimmaba iti lugan na sa kinapatang ida.
Nagpadispensar dagiti biktima gapu ti panangbugkaw da sa da pimmanaw met laeng ngem idi nakadanun da idiay Guimod Sur, simmaruno ti suspek a nangovertake kadakuada ket nagsardeng iti maysa a sari-sari store.
Idi agsublin ti suspek iti ayan da ket addan ti iggem na a paltog nga inpaturong na kada Oscar Viloria kenni Vico Angelico Savellano ket nagpangta pay sakbay a pimmanaw.
