Lima a nagsusugal, nakemmeg iti ili ti Caoayan

VIGAN CITY – Lima a nagsusugal ti natiliw iti naiwayat nga Anti-Illegal Gambling operation idiay Brgy Anonang Menor, Caoayan.

Nabigbig dagiti suspek a nagaayam iti Lucky 9 da Joan Briones, agtawen iti duapulo ket siam; Anna Martinez, agtawen iti duapulo ket walo ken ni Violeta Andallo, agtawen iti uppat a pulo ket maysa.

Dagiti met naga-ayam iti tong-its ket da Estrelita Abad, agtawen iti limapulo ket dua; Norma Carasi, agtawen iti innem a pulo ket walo ken ni Milagros Quadra nga agpapada a taga-Anonang Mayor.

Naala kadakuada ti dua a set ti baraha ken pusta a walopulo ket dua a pisos.

Sangwen dagiti suspek ti kaso a panaglabsing iti Presidential Decree 1602 wenno ti Anti-Illegal Gambling Act.