VIGAN CITY – Lima iti nakemmeg gapu iti panagsusugalda idiay Zone 6, Bantay.
Segun ti Bantay Municipal Police Station, dagiti nakemmeg ket da Junell Rabino, agtawen iti duapulo ket lima; Jayson Cortez, duapulo ket pito nga agpada nga agnaed idiay Paing, Bantay; Mark Anthony Espejo a taga-Buquig, Bantay; Gerald Angelo Alameda, agtawen iti duapulo ket pito nga agnaed idiay Tamag, Vigan City; ken Alvenedick Quebral, agtawen iti duapulo ket siam, naasawaan nga agnaed idiay Callaguip, Caoayan nga agpapada nga emplyado ti RNR Konstruk Corp.
Iti panagtitinnulong dagiti pannakabagi ti linteg ket naisayangkat ti anti-illegal gambling operation iti nasao a lugar kangrunaan iti masakupan ti Bantay Arcade a nagresultaan iti pannakakemmegda nga aggaay-ayam ti kara y krus a nakaalaan pusta a P560.
Naipan iti Bantay Municipal Police Station dagiti suspek tapno dumalan ti husto a proseso.
