VIGAN CITY – Lima iti nakemmeg idinto a dua iti nakalibas iti agsina nga anti-illegal gambling operation nga insayangkat dagiti pannakabagi ti linteg iti ili ti Narvacan.
Tallo iti nakemmeg pakairamanan ti dua a senior citizen gapu iti panagsusugalda idiay Brgy. Sulvec, Narvacan ket segun ti PNP dagiti suspek ket da Prosceso Martinez Viloria, agtawen iti innem a pulo ket maysa, naasawaan nga agnaed idiay Brgy. Turod, Narvacan; Marlyn Lumidao Tabuldo, agtawen iti limapulo ket tallo, naasawaan; ken Deogracias Espejo Manglinong, agtawen iti pitopulo ket lima, naasawaan nga agpada nga agnaed idiay Brgy. Sulvec, Narvacan.
Naaktuan dagiti pannakabagi ti linteg iti panagay-ayamda iti tong-its iti ruar iti pagtaengan ni Corazon Tabuldo iti nasao a lugar.
Naala kadakuada iti maysa a set iti baraha, maysa a kayo a lamisaan, tallo a monobloc a tugaw ken pusta nga aggatad iti P171.
Kasta pay a dua iti nakemmeg idinto a nakalibas ti kaduada kalpasan iti naisayangkat nga operasyon idiay Brgy. Pantoc, Narvacan.
Dagiti naglabsing iti Presidential Decree 1602 ket da Precy Cabristante Guieb, agtawen iti limapulo ket dua, balo, ken Marlyn Cabonias Serano, agtawen iti limapulo ket pito, balo nga agpada nga agnaed iti nasao a lugar idinto a ti naglibas a kaduada ket ni Marivic Batac, addan ti husto a tawen nga agnaed idiay Brgy. Pantoc, Narvacan.
Nagturong dagiti pannakabgi ti linteg iti nasao a lugar ket naaktuanda a nagay-ayam ti tong-its dagiti suspek ti abandonado a pagtaengan ni Rolando Soria.
Naala kadakuada iti maysa a set iti baraha, maysa a kayo a lamisaan, maysa a monobloc a tugaw ken limagasut sangapulo ket tallo a pisos a pusta.
Addan iti kustodiya dagiti pannakabagi ti linteg dagiti suspek tapno dumalan ti husto a proseso.
