VIGAN CITY – Lima ti nakemmeg gapu ti panagsusugalda idiay Zone 6, Bantay.
Naigbig dagiti suspek a da Junell Rabino, agtawen iti duapulo ket lima; Jayson Cortez, agtawen iti duapulo ket pito nga agpada nga agnaed iti Paing, Bantay; Mark Anthony Espejo a taga-Buquig, Bantay; Gerald Angelo Alameda, agtawen iti duapulo ket pito nga agnaed iti Tamag, Vigan City; ken Alvenedick Quebral, agtawen iti duapulo ket siam, naasawaan nga agnaed iti Callaguip, Caoayan, agpapada ga emplyado ti RNR Konstruk Corp.
Iti panagtitinnulong dagiti pannakabagi ti linteg ket naisayangkat ti anti-illegal gambling operation iti nasao a lugar kangrunaan iti masakupan ti Bantay Arcade a nagresultaan iti pannakakemmegda.
Naaktuan dagiti suspek nga agaayam ti kara y krus ken naala ti pusta a P560.
Naipan iti Bantay Municipal Police Station dagiti suspek tapno dumalan ti husto a proseso.
