VIGAN CITY – Lima a lugar ditoy probinsiya iti nakairekordan iti nangato a kaso ti dengue kas pinasingkedan ni Dr. Carmeliza Singson, ti mangidaulo ti provincial health office.
Maibasar iti kaudian a rekord nga iggem ti PHO- Ilocos Sur idi napan a lawas, ti syudad ti Candon ken Vigan ket karaman kadagiti lugar a kaaduan iti kaso ti dengue, pakairamanan ti ili ti Sta. Cruz, Magsingal ken San Juan.
Dagiti dua a naudi a natay gapu ti dengue ket naggapu idiay ili ti Magsingal ken taga- Salindeg, Vigan City nga agpada nga ubbing.
Gapu ti dayta, inbaga ni Dr. Singson a pangpaingeten da iti panangipakaammo kadagiti tattao nu anya ti 4S campaign ti Department of Health kontra dengue.
Immunan nga inbaga ti mangidaulo ti provincial health office nga uray nu umad-adu ti kaso ti dengue ditoy probinsiya, awan pay laeng iti dengue outbreak nga ideklerar da ta bassit pay laeng dagiti natay nu ikumpara kadagiti sabali a lugar ditoy pagilian nga adu ti kaso ti dengue na ken adun ti natnatay.
