VIGAN CITY – Nakikinnammayet ti Ilocos Sur Police Provincial Office ti City Drug Enforcement Unit ken Intelligence Section ti Lipa City Police Station tapno makemmeg babaen ti drug buy bust operation dagiti dua a suspek idiay Purok 2, Brgy. Pinagkawitan, Lipa City, Batangas.
Nabigbig dagiti suspek a da Julius Yago, agtawen ti uppat a pulo ket walo, mangidaulo ti Yago Drug Group ken miembro ti Dagupion – Gamponia Criminal Group ti Ilocos Sur kenni Regina Custodio agtawen ti uppat a pulo ket pito.
Segun ti Ilocos Sur Police Provincial Office, namonitor da ti aramid dagiti dua a suspek ket nakikinnammayet da ti Lipa City PNP isu a naiwayat ti operasyon a nakemmegen da Yago ken Custodio ket naala kadakuada ti sangapulo ket pito a sachet ti mapapati a shabu nga agdagsen ti 17.10 a gramo nga agatad ti sangagasut sangapulo ket innem a ribo a pisos.
Kalaksidan ti shabu a naala manipod kadagiti suspek narekobre ti kapulisan ti buy bust money a sangaribo a pisos ken boodle money, maysa a electronic weighing scale ken maysa a caliber 45 nga addaan ti serial number 34379 ken magazine nga adda ti pito a balana.
Iggemen ti Lipa City PNP dagiti suspek ken maisagsaganan ti kaso a panaglabsing ti Republic Act 9165 wenno Comprehensive Dangerous Drugs Act of 2002 ken Republic ACt 10591 wenno panagikot ti paltog.
