VIGAN CITY – Awan iti piyansa nga inlatang ti korte para iti temporaryo a pannakawaya-waya ni Melvin Jose Alamag nga agtawen ti uppat a pulo ket siyam, naasawaan, maysa a mangisursuro nga agnaed idiay Number 37 Purok Sajio, Loakan Proper, Baguio City a nakemmeg idi alas otso y media iti rabii ti March 3 idiay Barangay Singalat, Palayan City, Nueva Ecija.
Ti suspek ket lider ti Alamag Group a karaman iti illegal recruitment idiay probinsiya ti Nueva Ecija.
Segun ken ni Police Major Millenium Bantas, mangidaulo ti Criminal Investigation and Detection Group- Ilocos Sur, ti pannakakemmeg ti suspek a sumangsango iti kaso nga illegal recruitment a konektado ti economic sabotage ket babaen iti naiyulog a warrant of arrest kontra kenkuana a napetsaan idi May 24, 2019 nga inparuwar ni Hon. Eleanor Teodora Marbas – Vizcarra, acting presiding judge , Third Judicial Region, Regional Trial Court, Branch 40, Palayan City, Nueva Ecija.
Ti agdama, ti suspek ket ikoten ti CIDG- Ilocos Sur para iti proper disposition na.
