VIGAN CITY – Makikaysa ti Land Transportation Office-San Ildefonso iti makabulan a selebrasyon ti Women’s Month ita a bulan ti Marso babaen iti panangisayangkatda kadagiti nadumaduma nga aktibidad ken programa.
Iti pannaki-uman ti Bombo Radyo Vigan ken ni Larry Morales, maysa kadagiti programada ti “Libreng Sakay para kay Juana” a ti rutana ket manipud Vigan City agingga ili ti Narvacan ken Vigan agingga Sinait.
Agpaot daytoy a Libreng Sakay agingga katapusan ita a bulan ti Marso.
Adda maited nga stub kadagiti babbai nga isu ti iparangda no lumuganda tapno mailibreda iti plete.
Malaksid dayta, nagiwarasda iti tumbler, payong, sabong, balloon ken alcohol dispenser kadagiti babbai iti uneg ti opisina ti LTO-San Ildefonso.
Sabali pay ti Theoretical Driving Course nga insayangkatda idiay Magsingal tapno ikkan gundaway dagiti babbai a makaala iti student permit.
Kabayatanna, babaen met iti partisipasyon ti Land Transportation Franchising and Regulatory Board, mangted met ti maysa a transport cooperative NGA NICOLTSC iti 50 percent discount kadagiti pasahero a babbai ita nga aldaw manipud alas sais iti bigat agingga alas sais iti rabii.
Segun ken ni Raymond Bitonia, nupay dakkel a bumabaan ti pastrekda ti daytoy nga addang ket saandan a pinanunot ta ti kalikagumda ket makaited iti diskwento kadagiti babbai kas pammigbig iti kinabanuar ken kinapategda.
