VIGAN CITY – Agtultuloy ti pangallukoy ni City Veterinary Officer Rayeth Robeniol kadagiti pet owner nga agparehistroda para iti Free Mass Castrated/Spaying of Dogs and Cats agingga inton September 29.
Maisayangkat ti nasao nga aktibidad inton September 30 agingga October 1 iti alas otso iti agsapa agingga alas singko iti malem idiay Regional Evacuation Center, Ayusan Sur, Vigan City.
Segun ken ni Robeniol, paset ti aktibidad iti pannakikaysada iti selebrasyon ti World Rabies Day inton September 28.
Prayoridad ti Libreng Kapon dagiti aso ken pusa ken para payen iti panangital-oda iti responsible pet ownership agsipud ta maysa ti aso kadagiti maaddaan iti rabies a mabalin a maipasana iti tao isu nga adda ti public health concern na.
Malaksid dayta, maysa payen a wagasda ti nasao nga aktibidad tapno maliklikan dagiti stray dogs wenno dagiti agwarang warang nga aso nga isu ti mabalin a mangitunda iti aksidente kadagiti motorista.
Karaman pay kadagiti benepisyo a maited ti pannakakapon dagiti aso ken pusa ti panagbassit ti populasyonda; bumaba ti kina-aggresiboda ket nalaklakadanto nga aywanan; pangatwenna ti gundaway nga agbiagda a nasalun-at ken napaot; pababaenna ti tyansa ti panagsakitda iti kanser.
Dagiti interesado ket mabalinda a kontaken ti numero iti City Health Office wenno personal nga agturong iti opisinada iti Vigan City Hall.
