VIGAN CITY – Maangay idiay Narvacan District Hospital ti surgical mission nga imatonan ti World Surgical Foundation a proyekto ti Ilocos Sur Provincial Government, League of the Municipalities of the Philippines ken ti Narvacan -LGU.
Iti pannaki-uman ti Bombo Radyo Vigan ken ni League of Municipalities of the Philippines President ken Narvacan Mayor Luis Chavit Singson, naidumduma ita ti nasao a surgical mission ta saan laeng a simple a check up ti maidiaya no di ket libre a maoperaan dagiti adda sakit na a thyroid, cleft palate, hernia wenno dagiti bungaw, gallstone ken dagiti adda sakitna iti bato.
Gapu ti dayta, inallukoy ni Mayor Singson dagiti addaan kadagiti nasao a sakit nangruna dagiti marigrigat nga agkasapulan a gundawayanda ti nasao a banag ta eksperto dagiti mangtaming kadakuada.
Tallo nga aldaw nga agpaot ti surgical mission a marugian inton January 27 agingga 29 ken insingasing ti mayor a mapandan agpaiskedyul tapno saan unay nga agududpudop inton kaaldawanna.
