Mangiwayat ti Vigan City Veterinary Office iti libre a Kapon kadagiti aso ken pusa inton December 10-11, 2024.
Iti pannaki-uman ti Bombo Radyo Vigan ken ni Dr. Rayeth Robeniol, City Veterinarian, inton December 10 ket maangay ti panagpakapon idiay Purok a Bassit Covered Court idinto a ti December 11 ket maangay idiay Barangay 8 covered court iti alas otso y media iti agsapa agingga alas singko iti malem.
Awan ti target quota ti opisina ngem adda ti maisayangkat a pre-listing tapno mapakaamoan dagiti pet owner no ania dagiti nasken nga aramidenda ngem mabalin latta met ti walk-in.
Dagiti aso ken pusa ket mabalin laeng a makapon no adda innem a bulandan ket sakbay ti operasyon, makita pay nga umuna no mabalin met laeng a makapon ida.
Al-allukoyen ti opisial dagiti amin a Bigueño pet owner ti siudad a gundawayanda ti daytoy a maidiaya ken pagyamananna ti city government ti suporta nga ipapaayda latta kadakuada.
