VIGAN CITY – Impanamnama ni Deputy Speaker ken Ilocos Sur 1ST District Rep Deogracias “DV” Savellano a numan bilang maaprubaranton idiay senado ti House Resolution No 1103 ket librenton a maawat dagiti mangisursuro iti facemask, alcohol ken personal protective equipment nga aramatenda.
Iti pannaki-uman ti Bombo Radyo Vigan ken ni Rep Savellano, bigbigenna dagiti mangisursuro kas frontliner iti sektor ti pagadalan isu a rumbeng a masalwadan ti salun-atda ta dakkel iti akemda iti pagilian.
Nakapasan iti committee level ti kamara ti gakat ket manamnama a mapagpapatanganton iti plenaryo ken senado ket patien ti kongresista a babaen ti naipasa a resolusyon ket makatulong kadagiti adu a kasapulan dagiti mangisursuro.
Malaksid ti dayta, adda pay sabali a gakat a bukbuklenda a ti gagemna ket makaited iti tablet, laptop ken internet connection kadagiti mangisursuro ita a blended learning ti wagas ti panagadal.
