VIGAN CITY – Nangiyuswat ti Technical Education and Skills Development Authority ti libre a contact tracing training program tapno tulongan ti gobierno a makasapul kadagiti agbalin a contact tracer ita a panawen ti Covid19 pandemic.
Iti pannaki-uman ti Bombo Radyo Vigan ken ni TESDA Deputy Director General John Bertiz, idi Marso ket nairugi ti Level 1 contact tracing a mainaig no kasano a salwadan ti bagi idinto a ti Level 2 ket no kasano dagiti husto a wagas iti panagikkat kadagiti personal protective equipment.
Dagiti agbalin a contact tracer ket kasapulan a nakaturpos iti high school, makabasa, makasurat, saan a nababbaba ngem iti duapulo ket maysa ken limapulo ket siam ti tawenna kas imbilin ti Inter Agency Task Force.
Kabayatanna, saan a bumaba iti sangagasut a ribo ti kasapulan a contact tracer iti intero a pagilian isu nga ikagumaanda ti mangted ti libre panagsanay ken scholarship tapno ad-adu ti mangayat nga agserbi.
Adda ti maited a TESDA certification kadagiti makaturpos iti panagsanay nga isu ti iparangda iti Department of Labor and Employment ken ti Department of Health.
