Nangiruar iti official statement ni Santa, Ilocos Sur Mayor Jeremy Jesus Bueno III mainaig iti nadadael a seawall idiay Barangay Quezon, kasaruno ti amak dagiti agindeg iti kinatalged ti lugar.
Segun ken ni Bueno, nabayagen nga agkidkiddaw ti LGU-Santa iti pondo kadagiti national agency para iti pannakatarimaan ti seawall.
Numan pay nairaman daytoy iti Quick Response Fund idi umuna a paset ti 2026, ket saan a natuloy.
Kabayatanna, maar-aramiden ti temporaryo a solusyon babaen iti panagtitinnulong dagiti nadumaduma nga ahensia.
Mangted ti DPWH Ilocos Sur 2nd District Engineering Office dagiti gabion material ken technical supervision, idinto a ti Provincial Government of Ilocos Sur ti mangilatang kadagiti heavy equipment ken dagiti boulder, ken ti LGU-Santa ti mangbaklay iti labor.
Innayon ti mayor a naipatuloden dagiti gabion material ken nakasaganan ti pondo para iti labor.
