Nangisayangakat ti Local Government Unit Santa Municipal Disaster Risk Reduction and Management Office, kadua ti DepEd-Santa District ken PNP Santa, iti district-wide orientation mainaig School Safety and Preparedness idiay Santa Central School.
Dinar-ayan daytoy dagiti school head ken DRRM coordinators manipud iti nadumaduma a pagadalan iti ili ti Santa.
Iti pannaki-uman ti Bombo Radyo Vigan ken ni MDRRMO Vince Clyde Cardenas, napagpapatangan dagiti human-induced hazards, active attack incidents, emergency response, ken dagiti protocol para iti kinatalged.
Naiparang pay ti technical guidelines a “Building Safer Schools Through Preparedness”, a ti gagemna ket papigsaen ti kinasagana, koordinasion ken panagresponde dagiti pagadalan iti panawen ti emergency.
Gagem ti addang a masalwadan dagiti agad-adal, mangisursuro ken school personnel ken makaaramid iti nataltalged ken ad-adda a nakasagana nga school community.
