Makitkitan ti Department of Health (DOH) iti posible a pannakairaman ti Zero Balance Billing dagiti ospital dagiti lokal a gobierno inton 2026.
Segun ken ni DOH Spokesperson Albert Domingo, dayta ket gapu iti nagbalin a diskusyon iti Bicameral Conference Committee meeting a posible a manayunan iti P1 billion a pondo ti ahensya para iti pannakayatiddog ti nasao a programa.
Inlawlawag ni Domingo a ti nasao a pondo ket mabalindan a masakup dagiti level 3 local government unit hospital iti pagilian ket no saan a manayunan iti pondoda ket kabaelan latta a sakupen iti agdama a budget iti innem agingga walo a probinsia.
Kinunana a dagiti LGU a mabalin a mairanud iti Zero Balance Billing ket dagiti lokal a gobierno iti Sarangani, Laguna, Aklan ken Benguet bayat a kitkitaenda iti pannakairaman iti Pampanga, Bataan ken Quezon.
Kabayatanna, maibasar iti listaan idiay Malakanyang, nasurok 1,078,000 nga umili iti nagbalin a benepisyaryo iti nasao a polisiya iti uneg laeng iti uppat a bulan.
