Impaganetget ni Mamamayang Liberal Party-List Representative Leila de Lima a panawenen tapno madusa dagiti korap, kalpasan iti protesta a naangay idi kalman, Setyembre 21.
Karaman ni De Lima kadagiti nangidaulo iti kritisismo kadagiti mapapati nga anomalia ken korapsion kadagiti proyekto ti gobierno.
Kas House Deputy Minority Leader, nainget a binabalaw ni De Lima dagiti agpampanday-linteg a kasla saanda nga itantandudo ti interes ti umili, idinto a binabalawna pay dagiti opisial a nagunggonaan iti “kickbacks” ken panagkusit a mapapati a pakaigapuan ti dakkel a rigat kadagiti Pilipino, nangruna kadagiti panawen ti nakaro a layus.
Impalagip ni De Lima a saan nga agpatengga ti pungtot dagiti umili uray kalpasan a bumaba ti layus, ken nagpanawagan ti agtultuloy a panagtignay ken awag tapno maidarum dagiti nairaman iti korapsion, idinto a dinakamat pay ni De Lima ni Vice President Sara Duterte gapu ta kasapulanna a sungbatan dagiti anomalia ken korapsion iti pagilian.
Kas solusion, nagpanawagan ti kongresista iti Kongreso a mangipaulog ti “Independent Commission against Infrastructure Corruption” tapno nasinged a mataming ti nakaro a korapsion kadagiti proyekto ti gobierno.
Inallukoy pay ni De Lima ni Presidente Ferdinand R. Marcos, Jr. a mangsertipikar kas naganat ti House Bill No. 4453 a mangipatungpal iti nasao a komision. – Augie Arellano
