Nagpanawagan ni Senador Loren Legarda iti napigpigsa a proteksion para kadagiti periodista ken media worker kas pananglaglagip iti National Press Freedom Day ita nga Agosto 30.
Impaganetget ni Legarda a napateg ti nawaya ken natalged a media tapno masigurado ti karbengan ti publiko iti usto ken mapagtalkan nga impormasyon.
Segun iti senador, agtaltalinaed a karit kadagiti periodista ti di umiso nga impormasion, disinformation ken ti pannakaiwaras dagiti non verified a statement iti social media.
Impaganetgetna pay ti responsibilidad dagiti opisial ti gobierno ken institusion a mangsigurado a ti nairuar nga impormasionda ket naibatay iti ebidensia ken nalawag a naisina dagiti alegasion kadagiti napaneknekan a kinapudno.
Nagballaag ni Legarda kontra iti trial by publicity a kunana a mabalin a mangdadael iti panagtalek ti publiko iti media ken institusion.
Kagiddan daytoy, intandudo manen ti senador ti Senate Bill No. 807 wenno Media Workers Welfare Act a panggepna a pasayaaten ti kasasaad iti trabaho ken seguridad ti media workers. /via Bombo Kleo Dayag
