Binallaagan ni Senador Loren Legarda a saan a husto ti plano a panagangkat ti Department of Agriculture iti 300,000-350,000 a metriko tonelada ti ikan ita a nangina pay laeng ti presio ti krudo ta ad-adda laeng a mangparigat kadagiti mangngalap, ket impaganetgetna a nasken nga ipangruna ti gobierno ti direkta a suporta babaen iti VAT suspension iti krudo.
Segun ken ni Legarda, saan a mabalin nga isukat dagiti mangngalap iti imported nga ikan.
Inyunay-unay ti senador a ti kasapulan dagiti mangngalap ket tulong, suporta iti pagbiaganda, ken paglag-ananda iti presio ti krudo ta patienna a no awan dagiti mangngalap, awan met ti kanen dagiti pamilia a Pilipino.
Umab-abot iti 80 percent iti gastoda iti krudo, rason no apay nga adu ti nangitambak iti bangkada.
