Pinasingkedan ni Rhon Arquelada, Ilocos Sur Provincial Disaster Risk Reduction and Management Officer nga adda pay laeng iti normal ti water level dagiti karayan iti probinsia.
Iti pannaki-uman ti Bombo Radyo Vigan ken ni Arquelada, manamnama latta ti natudo a paniempo iti daytoy a lawas agsipud ta adda pay inruar ti PAGASA A yellow warning a kayatna a sawen ket mapasaran ti napigsa a tudo nga agpaot iti dua agingga tallo nga oras.
Inlawlawagna nga awan ti bagyo ita a mangapektar iti probinsia ngem ti laeng Southwest Monsoon ken habagat ti agpampannuray.
Nupay kasta, agtultuloy ti monitoring ti provincial ken municipal disaster risk reduction and management offices tapno masigudan no adda dagiti nasken a marespondean gapu iti napigsa a tudo a mabalin a mangitunda iti layus.
