Nakemmeg ti Bureau of Immigration (BI) ti mapapati a lider ti maysa a Japanese scam group nga agop-operate ditoy Pilipinas.
Target ti grupo dagiti nataengan nga umili idiay Japan, nga agpammarangda kas pannakabagi ti linteg tapno makaalda iti kuarta.
Uppat nga opisial ti BI Fugitive Search Unit (FSU) ti nangkemmeg ti suspek idiay Manila.
Segun kenni BI-FSU Head Chief Rendel Sy, ti grupo ket under surveillance a nabayagen, ken dagiti dadduma a miembro ket nakemmeg met laeng idi napan a tawen.
Ti modus operandi iti “Luffy” group ket pakairamanan dagiti phone calls manipud kadagiti Philippine-based scammers ken dagiti local actors nga agkolkolekta iti kuarta manipud kadagiti pagtaengan dagiti biktima.
Nakumpiskar dagiti otoridad ti peke a Filipino ID ti suspek.
Sakbay ti pannakaideport na idiay Japan tapno sumango iti kaso, imbestigaran ti BI-FSU dagiti mabalin a biktima a Pilipino.
Impaganetget ni Chief Sy ti kinapateg ti pannakakemmegda tapno saan a palawaen ti grupo ti operasionda a pakairamanan dagiti Pilipino ken panag-scam-da kadagiti umili a Pilipino.
