Nangitunda ti panaglayus ken panagreggaay ti daga ti agtultuloy a napigsa a panagtudo iti sumagmamano a paset ti Nueva Ecija a nakaapekto ti daloy ti trapiko, dagiti pagmulaan ken nangitunda ti temporario a panagserra ti maysa a detour road.
Napasamak ti maysa a landslide idiay Nueva Ecija-Aurora Road idiay Barangay Calaanan, Bongabon ket dagus a naisayangkat ti clearing operations isu saan a naaddaan ti nakaro nga aberya dagiti motorista.
Idiay Barangay Roque, Bongabon, umabot ti layus iti maysa a rangtay ken limned dagiti mula a mais.
Gapu iti agtultuloy a panagngato ti danum, naibakwit dagiti residente kadagiti natalged a lugar pakairamanan dagiti taraken da a dingwen.
Kabayatanna, temporario nga impaserra dagiti otoridad ti detour road iti maar-aramid a rangtay idiay Barangay Sagana, Laur, tapno agayus a nalaing ti danum iti karayan ken maliklikan ti nalawa a pannaka-layos iti kaasideg a komunidad.
