Layus idiay Thailand, siam a tao ti natay

Siam a tattao ti natay iti layus idiay Thailand a nakaapektaran iti 553, 921 a pagtaengan idinto a 13,000 nga umili ti kapilitan a naibakwit.

Segun kadagiti otoridad, walo a probinsia ti naapektaran iti layus ket nabilin dagiti nadumaduma nga ahensia para iti alisto a tulong a kasapulan dagiti agindeg a naapektaran iti layus.

Kabayatanna, dua nga ospital met nga asideg iti probinsia ti Pattani ti nangisardeng iti operasyonda gapu iti panagsagsaganada iti layus tapno maliklikan ti pannakadadael dagiti medical facilities.

Segun iti Meteorological Department ti Thailand, ti habagat a mapaspasaran iti nasao a pagilian ket gapu iti climate change, ket nabalakadan dagiti agindeg nga agsagana latta kadagiti epekto ti napigsa a panagtudo.