Umaboten iti mapatta-patta a 1.3 agingga 3.2 kilometers ti lava flow manipud iti Mi-isi, Bonga, ken Basud Gullies ti Bulkang Mayon.
Segun iti Philippine Institute of Volcanology and Seismology, nairekord ti lava flow iti alas syete trese agingga alas dyes singko iti rabii kabayatan nga agtultuloy ti effusive eruption ti bulkan.
Kabayatanna, itay agsapa ket nairekord ti 253 a rockfall events, 44 a pyroclastic density currents, ken maysa a volcanic earthquake.
Nairekord pay ti 2,327 a tonelada ti sulfur dioxide flux, ken plume nga agingga 600 a metro ti kangatona manipud iti crater sakbay a nagkayamkam iti abagatan a laud ken amianan a laud.
Agtaltalinaed iti Alert Level 3 iti Bulkang Mayon, ket nainget a maiparit ti iseserrek iti innem a kilometro a permanent danger zone ken ti panangipatayab iti lugan iti tangatang iti rabaw ti bulkan.
