VIGAN CITY – Addan ti uppat a napili a benepisyaryo ni Vice Mayor Atty. Jeremy “JJ” Bueno a maikkan ti laptop babaen iti tulong dagiti gayyemna idiay Metro Manila tapno matulungan dagiti estudiante a kayatna ti makaadal ita a COVID19 pandemic ngem saanda a magtengan ti gumatang kadagiti nasao a gadget.
Iti pannaki-uman ti Bombo Radyo Vigan ken ni Vice Mayor Bueno, adda pay ti immunan a sangapulo a ribo a pisos a donasyon manipud Santanian Association of Hawaii a maipaay kadagiti sangapulo ket tallo a pagadalan ti Santa a panggatang kadagiti kasapulan dagiti ubbing.
Dagiti kwalipikado iti nasao a programa ket rumbeng a nakaenrol ita a tawen, nalaing iti klase ken aggapu iti marigrigat a pamilia ta isuda ti maipangruna tapno saan a maipaidam kadakuada ti gundaway a makasurot iti baro a wagas iti panagadal.
Iti agdama, limitado pay laeng dagiti laptop nga ipaayda ngem no nasayaat ti panangipatungpal ti lokal a gobierno ti Santa ket kitaenda a naimbag ti badyet a mailatang tapno ad-adu pay ti matulongan ken mangnamnamada nga adda pay naayat a tumulong.
