VIGAN CITY – Tresspass to dwelling, Malicious mischief ken panaglabsing iti Republic Act 7610 wenno Child Abuse Law ti kaso a sangwen dagiti tallo a suspek nga iligal a simrek iti maysa a pagtaengan idiay Brgy. Lussoc, Sto. Domingo a nangdadael kadagiti alikamen ken nangbutbuteng kadagiti ubbing nga adda iti aglawlawda.
Nabigbig dagiti suspek a da James Eric Tuzon, agtawen iti duapulo ket tallo; Ian Roy Tayaan, agtawen iti duapulo ket maysa, estudiante nga agpada a taga-Brgy. Quimmarayan ken ni Rodel Paz, agtawen iti tallopulo ket siam a taga-Brgy. Paguraper.
Kabayatanna, dagiti biktima ket ni Perfecto Tacbas y Bersalona, agtawen iti pitopulo ket uppat, akinkukua iti pagtaengan ken ni Carlo Fagela, agtawen iti duapulo ket maysa, 3rd year college a taga-Brgy. Borobor pakairamanan dagiti dua a menor de edad a taga-Brgy. Lussoc.
Iti pannaki-uman ti Bombo Radyo Vigan ken ni Police Captain Christopher Ramat ti Sto. Domingo Municipal Police Station, pwinersa dagiti nakainom a suspek a luktan ti nakarikep a gate tapno makastrekda iti pagtaengan ti biktima ken inkugtarda ti nakaparking a motorsiklo pakairamanan ti lamisaan dagiti manarimaan nga agmod-module ken pagtugawan.
Gapu ti dayta, nangisayangkat dagiti pannakabagi ti linteg iti hot pursuit operation ket nakemmeg dagiti dua a suspek idinto a sapsapulenda pay laeng ti maysa a naglibas a ni Tuzon.
Pinasingkedan ni Ramat a maysa kadagiti suspek ket dati a nobio ti apo ti biktima ken pinalagipanna dagiti nagannak a bagbagaanda dagiti annakda tapno saanda a maisagmak kadagiti tattao a nalaing nga agpangta.
