VIGAN CITY – Tallo a lallaki a sumangsango iti agduduma a kaso iti kinemmeg dagiti pannakabagi ti linteg iti siudad iti Candon.
Immuna a nakemmeg ni Rolando Capinding Junio alyas Orlan, agtawen ti limapulo ket dua, construction worker, naasawaan nga agnaed idiay Brgy. Calaoan gapu iti tallo a bilang iti Acts of Lasciviousness iti salinong iti Article 336 nga adda iti nailatang a pyansana nga aggatad iti 180,000 a pisos babaen ti bileg ti warrant of arrest a nairuar idi June 22 iti agdama a tawen.
Simmaruno a nakemmeg ni Amado Rolyo Arguilles, agtawen ti limapulo ket maysa, naasawaan, construction worker nga agnaed idiay Brgy. Tumalaytay, Mandaon, Masbate City ngem agdama nga agtaltalinaed idiay Parioc 1st, Candon City.
Ti pannakakemmeg ti suspek ket gapu iti panaglabsingna iti section 9 iti RA 11332 ket narekomendaran iti pyansana a talloribo a pisos babaen iti warrant of arrest nga inruar ni Hon. Judge Vida Cortez-Jimeno iti 12 Municipal Circuit Trail Court, Tagudin.
Naserbian pay iti warrant of arrest ni Nelson Balledeo, agtawen ti duapulo ket dua, baro, mannalon nga agnaed idiay Brgy. Bugnay, Candon City gapu iti kaso na nga Attempted Homicide a nailatangan iti pyansa a 36,000 a pisos a napetsaan idi October 25, 2019 babaen ti bileg ni Hon. Joselito Benedicto nga Acting Presiding Judge, 9th Municipal Cirucuit Trial Court, First Judicial Region, Gregorio Del Pilar-Sigay.
