VIGAN CITY – Maysa ti natay idinto a dua ti nadunor iti napasamak nga aksidente idiay Barangay Poblacion, Sta. Maria.
Nabigbig ti biktima a ni Jun Almazan, agtawen iti duapulo ket tallo idinto a dagiti nadunor a kaduana ket da Juan Vitales, agtawen iti duapulo ket tallo, nagmaneho iti motorsiklo ken ni Florentino Fagela, agtawen iti duapulo, a tubo iti Barangay Pang-ot, Pilar, Abra.
Nagkakalubbon dagiti tallo iti motorsiklo idi daldalyasatenda ti agpalaud a direksyon idin ta saan a nakontrol ti drayber ti manibelana ket naidungparda iti konkreto nga alad iti akin-kannawan a paset ti kalsada sa naitinnagda iti kamaisan.
Iti pannaki-uman ti Bombo Radyo Vigan, manarimaan ti pannakapalawa ti kalsada a nakaaksidenteanda ngem saan a naideretso a nasemento agingga iti shoulder lane idinto a dagiti street lights ket saan pay a naisubli isu a nasipnget ti lugar.
Gapu dayta, nagsagabada amin iti dunor ket naipaagasda iti Ilocos Sur District Hospital, Barangay Paratong, Narvacan para ti pannakatamingda ngem naideklarar a dead on arrival ni Almazan idinto nga agpapalaing dagiti kaduana.
Mapapati a nakainom dagiti tallo ken awan helmetda idi napasamak ti aksidente.
