VIGAN CITY – Dead on Arrival ti maysa a lalaki idiay Barangay Sinabaan, Bantay ta pinaltogan dagiti saan pay nabigbig a suspek.
Nabigbig ti pimmusay a ni Bernardo Nuñez Jr., agtawen ti limapulo ket dua, naasawaan nga agnaed iti nasao a lugar.
Iti pannaki-uman ti Bombo Radyo Vigan ken ni PMaj. Juan Jhayar Maggay iti Bantay Municipal Police Station, nagsardeng ni Nuñez a naglugan iti kurong-kurongna kaduana ti asawana idin pinaltogan ti saan pay a nabigbig a dua a suspek a nakalugan iti motorsiklo a sinarunoda.
Nagsagaba ti biktima iti dua a tama iti bala ti paltog iti bukot ken maysa iti ulona isu a naipan iti Metro Vigan Hospital ngem naideklarar a natay idinto a nakalibas iti suspek kalpasan iti pammaltog.
Gapu iti pasamak ket kiddaw ni Maggay kadagiti nakakita iti pasamak nga agsarita wenno makitinnulongda iti imbestigasyon tapno marisot ken maikkan iti hustisya iti pannakatay ti biktima.
